झापा । शिक्षा, विज्ञान तथा प्रविधि मन्त्रालयले विद्यालयको हिउँदे तथा बर्खे बिदाको समय १५ दिन कटौती गरेको छ।

हालसम्म एक शैक्षिक सत्रमा ४५ दिन दिइँदै आएको यस्तो बिदा यस शैक्षिक सत्रका लागि भने ३० दिन मात्रै हुने भएको छ । सरकारले सातामा दुई दिन सार्वजनिक बिदा (शनिबार र आइतबार) दिने निर्णय गर्दा पठनपाठनमा पुग्ने क्षति न्यूनीकरण गर्न मन्त्रालयले यस्तो व्यवस्था गरेको हो।

मन्त्रालयको निर्णय कार्यान्वयनका लागि शिक्षा तथा मानव स्रोत विकास केन्द्रले मङ्गलबार ७७ वटै शिक्षा विकास तथा समन्वय एकाइ र स्थानीय तहलाई पत्राचार गर्दै निर्णय कार्यान्वयन गर्न निर्देशन दिएको छ।

मन्त्रिपरिषद्को गत चैत २२ गतेको बैठकले सातामा दुई दिन सार्वजनिक बिदा दिने निर्णय गरेको थियो। उक्त निर्णय कार्यान्वयनका सन्दर्भमा केन्द्रले मङ्गलबार बिदा कटौतीसहित छ बुँदे परिपत्र जारी गरेको छ। जसअनुसार विद्यालयमा प्रत्येक दिन प्रार्थना समय १५ मिनेट मात्रै कार्यान्वयन गर्ने, खाजा समय ३० मिनेट मात्रै छुट्याउने तथा सोमबारदेखि शुक्रबारसम्म पूरा समय पठनपाठनसँग सम्बन्धित क्रियाकलाप सञ्चालन गर्ने व्यवस्था गरिएको छ। त्यस्तै पहिलो र दोस्रो त्रैमासमा गरिने आन्तरिक मूल्याङ्कन पठनपाठन भएकै दिन वा पठनपाठनलाई असर नपर्ने गरी व्यवस्थापन गर्ने तथा अन्तिम परीक्षा र नतिजा प्रकाशनका लागि शैक्षिक सत्रको अन्तिम १२ दिन छुट्याउन केन्द्रले निर्देशन दिएको छ।